TRADICIÓN: L'ANTROXU

Yá ta equí l’Antroxu; esos díes de folixa y de fartures enantes la Cuaresma lo que quier dicir que queden 40 díes pa Selmana Santa. Entamaba’l Miércoles de Ceniza, momentu nel que los fieles cristianos ayunaben y evitaben comer carne, d’ehí la pallabra carnaval que vien de "carnevale", na que “carne” ye carne y “levare” quitar.

Pero Antroxu, que n’otros llaos ye Antrueyu, Antruidu, Antroiru o Entroido, nun tien na que ver col cultu cristianu, vien del llatín "introitus" que quier dicir entrada y celebrábase col añu nuevu, davezu’l mesmu día Navidá.

L’orixe d’esta folixa yeren les celebraciones campesines paganes que se facíen ente l‘equinocciu d'iviernu (momentu nel que la nueche y el día duren lo mesmo) y la primavera, y nes que se festexaba'l nacimientu de la lluz, el medrar de los díes, que’l ciclu agrariu tornaba y que la vida espoxigaba dafechu. Pero a la tierra había que l’ayudar a xorrecer, y esto ye’l raigañu de la tradicción occidental de prender rames de paya pa facer qu’espolletara la collecha: El Payizu o Los Payones.

Nestes celebraciones los vecinos de munchos pueblos mazcaritábense y antroxábense, folixaben, facíen bromes y burlles, sonaben lloqueros, llueques o cencerros y fartucábense dafechu davezu de carne de gochu (ya qu’había que lo gastar pa que nun s’estropiare y amás garrar fuercies pa trabayar) y de llambionaes (como frixuelos, picatostes o casadielles).

¡Pero, ai amigu!, col cleru mos topamos. A la Ilesia nun-y prestaben estes folixes ya intentó llendales y amenorgales a unos dìes enantes del Miércoles de Ceniza (Xueves de Comadres, Domingu Gordu, y Llunes y Martes d’Antroxu). Depués de la Guerra Civil L'Antroxu prohibióse dafechu y desanicióse, cola democracia espoxigó otra vegada, pero llueu la televisión y los carnavales d'otros llugares como Brasil, Cádiz o Tenerife fizo que s’escaeciere esta tradicción asturiana.

Angüaño tovía sobreviven n’Asturies dalgunes d’estes mazcaraes como Los Sidros y Les Comedies (Valdesotu, Sieru), El Guirria (San Xuan de Beleño, Ponga), Os Reises d’El Valledor (Ayande), Os Reises de Tormaleo (Ibies), Los Aguilandeiros de San Xuan de Villapañada (Grau), Los Zamarrones de L.ḷena y Los Guilandeiros de Tinéu. Y otres, como Los Bardancos de Casu, Les Comparses de Quirós, Los Aguilanderos de Xedré o La Puela o Los Zaparrastros d’Ayer tan esperando a ser recuperaes otra vegada.