SELMANA DE LES LLETRES ASTURIANES: CONCEYU BABLE

 

Conceyu Bable ye'l protagonista de la XLV Selmana de les Lletres Asturianes al cumplise los 50 años de la primera apaición pública d’esta organización que glayaba pola defensa de la llingua asturiana como un bien cultural y pola so presencia nos medios de comunicación y na escuela. En payares de 1974, la revista Asturies Selmanal entamaba a espublizar  una seición baxo’l nome de «Conceyu Bable» y neses páxines ta la semiente d’un llabor de dinamización social que foi muncho más allá de la reivindicación llingüística. L’autonomía y los símbolos que la identifiquen como la bandera o l’himnu, les estayes de la música asturiana como la gaita asturiana, l’asturianada o'l cantar d’autor, el deporte tradicional y ta'l  quesu o la sidra… garraron más puxu por mor de la xente de Conceyu Bable. Pero la so gran contribución foi poner en valor a la llingua asturiana como un elementu patrimonial llogrando  xenerar al so rodiu una nueva identidá social, llegando dafechu la so campaña pol «Bable nes escueles» a tolos requexos d’Asturies. Al dedicar esta Selmana de les Lletres del 2024 a Conceyu Bable, reivindícase' puxu de la comuña como'l d'esta asociación a la que tántu-y debemos tolos asturianos.¡Gracies Conceyu Bable por too y por tantu!